2022 жылы 13 желтоқсан күні Түркия Республикасы, Стамбул қаласында Алматы қаласы музейлер бірлестігінің «Дала дауысы» атты халықаралық көрмесінің ашылуы өтті.
Көрме Қазақстан Республикасы мен Түркия Республикасының арасында дипломатиялық қарым-қатынас орнағанына 30 жыл толуына орай Алматы қаласы Мәдениет басқармасына қарасты Алматы қаласы музейлер бірлестігі Түркия Республикасында жылжымалы көрме ұйымдастырып отыр.
Халықтарымыздың тарихы тілі мен мәдениеті тамырлас, дүниетанымы мен түсінігі жақын. Бүгінде екіжақты қарым-қатынастарымыз барлық салаларды қамтуда және қарқынды түрде дамып келеді.
Көрменің мақсаты – келушілерді түбі бір түркі халықтарының көнеден жеткен тарихымен, музыкалық мәдениетімен таныстыру.
Қазақстан Республикасының Тәуелсіздігі күні мерекесі қарсаңында өткізілген көрмеде Ықылас атындағы халық музыкалық аспаптар музейі қорындағы бірегей, құнды жәдігерлер Түркия жұртшылығы назарына ұсынылды.
Көрменің ашылу салтанатында Бақыргөй ауданы Театр департаментінің директоры Асуман Айдоғмуш, Қазақстанның мәдениет және сауда орталығы төрағасының орынбасары, Қазақстанның Еңбек сіңірген қайраткері, мәдениеттанушы Ержан Уайс, Қазақстан Республикасының Ыстамбул қаласындағы Бас консулы Әлім Дәуренұлы Байел және Алматы қаласы музейлер бірлестігі директоры Сағындықова Ляззат Құдайбергенқызы жылы лебіздерімен бөлісті.
Көрменің аудиториясы: экспозиция келушілердің барлық санаттарына – балаларға, студенттерге, ғалымдарға, туристерге арналған.
